ماندئلا

۳۷ ـ ايل ظولمه قارشي داياندي

فدا قيلدي هر نمنه سين* «ماندئلا»

ييخدي آخير مردانه ليک گوجو ايله

« آپارتايد»ين شوم بينه سين ماندئلا　

خوش داشيردي آزادليغين يوکونو

اودا چکدي «انگليس»ين کؤکونو

يئله وئردي استبدادين توکونو

حاکم ائتدي اراده سين ماندئلا　

بير گؤز ايله باخدي آغا ـ قارايا

انسانليق اؤلچوسون چکدي آرايا

انسان دئيه قالخدي هايا ـ هارايا

مروّتين سالدي بحثين ماندئلا　

همّت کمري له باغلادي بئلي

قازاندي صلح دن نشان «نوبل»ي

«تبريز» ده گؤرسه يدي گر «ساري تئل»ي**

سازيندا دينله ردي سسين ماندئلا

　
آزادليق اؤيره تدي آزاد ائل منه

« جعفري» بو يولدا وئردي ديل منه

الهام قايناغي دير ساري تئل منه

بوردا گؤرسون جان ذيروه سين ماندئلا

..................................  

*هر نمنه سین = hər nəmnəsin = هر نه یین (اورمو اصطلاحی دیر)

** ساري تئل = SARI TEL  = تبريزده ۲۰        ـ ايل بوندان اوّل رضا افشار واسطه سيله يارانميش و ائله اؤز واسطه سيله باشچيليق ائديلن بير عاشيق ارکستري.

 تهران ۲۳/۰۹/۱۳۹۲